Category: Мэдээ

“Дарханы Төмөрлөгийн үйлдвэр” ХХК болон Боловсролын зээлийн сан хамтран 2025 оны 05 дугаар сарын 09-ний өдөр Дархан-Уул аймагт “Боловсрол – Нээлттэй хаалганы өдөрлөг”-ийг амжилттай зохион байгууллаа. Энэхүү өдөрлөг нь Монгол Улсын Засгийн газрын хэрэгжүүлж буй “Ган үйлдвэрлэлийн цогцолбор” мега төслийн хүрээнд шаардлагатай мэргэжилтэн, хүний нөөцийг дотоодоос бэлтгэх, ажиллах хүчний ур чадварыг дээшлүүлэхэд боловсролын төрөөс олгож буй санхүүжилтийн боломжийг үйлдвэрийн ажилчдад хүргэх зорилготой байв. Арга хэмжээнд “Дарханы Төмөрлөгийн үйлдвэр” ХХК-ийн ажилчид болон тэдний гэр бүлийн гишүүд өргөнөөр оролцож, Боловсролын зээлийн сангийн үйл ажиллагаа, тэтгэлэг, зээл, буцалтгүй тусламжийн талаар дэлгэрэнгүй мэдээлэл аван, чөлөөт хэлэлцүүлэг өрнүүллээ. Өдөрлөгийн үеэр Дарханы Төмөрлөгийн үйлдвэр ХХК-ийн Бүтээмж хариуцсан менежер Д.Баярбилэг үйлдвэрийн үйл ажиллагаа болон хүний нөөцийн хэрэгцээ, ирээдүйн хөгжил, ажиллах хүчний ур чадварыг дээшлүүлэх шаардлагын талаар танилцуулсан бол Боловсролын зээлийн сангийн ажлын албаны дарга О.Сийлэгмаа сангийн үйл ажиллагаа, алсын харааны талаар мэдээлэл өглөө. Мөн Сургалтын зээл, тэтгэлгийн хэлтсийн дарга Б.Гантөмөр гадаадын их, дээд сургуульд суралцах боломж болон зээл, тэтгэлгийн талаар, Сургалтын буцалтгүй тусламжийн хэлтсийн мэргэжилтэн Г.Март дотоодын их, дээд сургуулийн оюутнуудад чиглэсэн буцалтгүй тусламж, тэтгэлгийн талаар тус тус танилцуулга хийв. Түүнчлэн Мэдээлэл технологийн хэлтсийн дарга Б.Баянмөнх “Боломж ба шийдэл” сэдвийн хүрээнд танилцуулга хийж, оролцогчдын асуултад хариулсан юм. Энэхүү өдөрлөг нь боловсрол, үйлдвэрлэлийн салбарын уялдаа холбоог бэхжүүлэх, мэдлэгт суурилсан эдийн засгийн хөгжилд бодит хувь нэмэр оруулсан чухал алхам боллоо.

2025 оны 05 дугаар сарын 09-ний өдөр ШУТИС-ийн Дархан-Уул аймаг дахь Технологийн сургуульд Дарханы Төмөрлөгийн үйлдвэр ХХК, ШУТИС-ийн Дархан-Уул аймаг дахь Технологийн сургууль, Боловсролын зээлийн сан хамтран “Боловсрол – Нээлттэй хаалганы өдөрлөг”-ийг зохион байгууллаа. Арга хэмжээнд тус сургуулийн багш, ажилтан, оюутан болон Ерөнхий боловсролын төгсөх ангийн сурагчдын төлөөлөл өргөнөөр оролцсон юм. Өдөрлөгийн эхэнд Дарханд баригдахаар төлөвлөгдөж буй металлургийн цогцолбор төслийн зорилго, ач холбогдол, хүний нөөцийн урт хугацааны хэрэгцээ, шаардлагын талаар дэлгэрэнгүй мэдээлэл өгсөн бөгөөд энэхүү төсөл нь орон нутгийн хөгжлийг дэмжих томоохон хүчин зүйл болохыг онцоллоо. Үүний дараа ШУТИС-ийн Дархан-Уул аймаг дахь Технологийн сургуулийн сургалтын хөтөлбөр, хэрэгжүүлж буй төсөл хөтөлбөрүүд, тэдгээрийн үр өгөөж, оюутны хөгжлийг дэмжих орчны талаар танилцуулга хийсэн юм. Арга хэмжээний гол хэсэгт оролцогчдод сургалтын буцалтгүй тусламж, дотоодын болон гадаадын тэтгэлэгт хөтөлбөр, хөнгөлөлттэй зээлд хамрагдах нөхцөл болзол, бүрдүүлэх материал, цахим системээр мэдээлэл авах боломжууд зэрэг боловсролын санхүүжилтийн талаарх цогц мэдээллийг танилцуулсан. Энэхүү өдөрлөг нь үйлдвэрлэл, боловсролын байгууллагуудын хамтын ажиллагааг бэхжүүлэхийн сацуу ирээдүйн мэргэжилтнүүдэд чиглэсэн бодлогын уялдаатай, мэдлэгт суурилсан хөгжлийн чухал алхам боллоо.

2025 оны 4 дүгээр сарын 24-ний өдөр Монгол Улсын Боловсролын зээлийн сан (БЗС) болон Тайландын Махидолын их сургуулийн төлөөлөгчдийн хооронд хамтарсан уулзалт Улаанбаатар хотноо зохион байгуулагдлаа. Уулзалтад БЗС-ийн Ажлын албаны дарга О.Сийлэгмаа, Махидолын их сургуулийн “Сириндхорн” протез, ортозын сургуулийн захирал Гулапар Срисавасди, тус сургуулийн дэд захирал Саситон Суктом, мөн Бие бялдар сэргээн засах судлалын Монголын нийгэмлэгийн тэргүүн Б.Золзаяа, болон бусад албаны хүмүүс оролцов. Тус уулзалтын гол зорилго нь талуудын үйл ажиллагааны чиглэл, бодлого, туршлага, хөтөлбөрийн талаар харилцан мэдээлэл солилцож, цаашид хамтын ажиллагаа хөгжүүлэх боломжуудыг судлахад оршив. Уулзалтын үеэр боловсролын салбар дахь хамтын ажиллагааг өргөжүүлэх, шинээр мэргэжилтэн бэлтгэх чиглэлээр хамтран ажиллах боломжуудыг хэлэлцсэн юм. Тухайлбал, Махидолын их сургуульд протез, ортозын чиглэлээр Монголын оюутнуудыг сургах, Монгол Улсын эрүүл мэндийн салбар дахь протез, ортозын мэргэжилтнүүдийн чадавхийг нэмэгдүүлэх, чиглэлээр санал солилцов. Энэхүү уулзалт нь талуудын хооронд харилцан ойлголцол бий болгож, хамтын ажиллагааны эхний алхам болсон ач холбогдол бүхий уулзалт боллоо.

2025 оны 4 дүгээр сарын 16-ны өдөр Боловсролын зээлийн сан (БЗС) болон Дарханы төмөрлөгийн үйлдвэр ХХК нь хамтын ажиллагааны санамж бичигт гарын үсэг зурж, хоёр байгууллагын түншлэлийг албан ёсоор эхлүүллээ. Санамж бичигт БЗС-ийн Ажлын албаны дарга О.Сийлэгмаа, Дарханы төмөрлөгийн үйлдвэр ХХК-ийн Гүйцэтгэх захирал Б.Чагнаадорж нар гарын үсэг зурсан юм. Санамж бичгийн зорилго нь Монгол Улсын Засгийн газраас хэрэгжүүлж буй 14 мега төслийн нэг болох “Ган үйлдвэрлэлийн цогцолбор” төслийн хүрээнд шаардлагатай хүний нөөцийг бэлтгэх, чадварлаг мэргэжилтнүүдийг сургах, мэргэжил олгох болон мэргэшүүлэх, давтан сургах үйл ажиллагааг эрчимжүүлэх, суралцагчдыг БЗС-ийн зээл, тэтгэлэгт хөтөлбөрт хамруулах хамтын ажиллагааг өргөжүүлэхэд чиглэж байна. Энэхүү санаачилга нь төр, бизнесийн байгууллагын түншлэлийн үр дүнд боловсролын зээлийн сангийн нийгмийн хариуцлага, хүрэлцээтэй санхүүжилтийн бодлогыг үйлдвэрлэлийн салбарт ойртуулж буй чухал алхам болж байна. Тус арга хэмжээнд Дарханы төмөрлөгийн үйлдвэр ХХК-ийн Бүтээмжийн менежер Д.Баярбилэг, Боловсролын зээлийн сангийн Мэдээлэл технологийн хэлтсийн дарга Б.Баянмөнх нар оролцож, хоёр талын хамтын ажиллагаа цаашид үр дүнтэй, тогтвортой өргөжих боломжтойг онцлон тэмдэглэлээ.

Боловсролын зээлийн сантай хамтын ажиллагаатай Бүгд Найрамдах Солонгос Улсын Чонбук их сургуулийн Олон улсын харилцааны албаны менежер Жон Сүён болон Ажлын албаны дарга О.Сийлэгмаа, Сургалтын зээл, тэтгэлгийн хэлтсийн дарга Б.Гантөмөр нар уулзав. Уулзалтын үеэр Монгол Улсын Ерөнхийлөгчийн тэтгэлгээр Чонбук их сургуульд суралцаж буй 24 оюутны сургалтын явц, сурлагын амжилт, төлбөрийн мэдээлэл болон эдгээртэй холбоотой асуудлуудыг хэлэлцэв. Түүнчлэн цаашдын хамтын ажиллагааг өргөжүүлэх хүрээнд Монгол Улсад эрэлттэй, тэргүүлэх мэргэжлээр зөвхөн бакалаврын түвшинд төдийгүй магистр, докторын зэрэгт оюутан элсүүлэх асуудал, мөн төрийн албан хаагчдыг мэргэшүүлэх сургалтад хамруулах чиглэлээр хамтран ажиллах боломжийн талаар харилцан санал солилцов. Уулзалт нь хоёр талын хамтын ажиллагааг өргөжүүлэх, боловсролын салбар дахь түншлэлийг гүнзгийрүүлэхэд чухал ач холбогдолтой байлаа.

Боловсролын зээлийн сангийн Ажлын албаны дарга О.Сийлэгмаа Ажлын албаны дэргэдэх Орон тооны бус зөвлөлийн гишүүдтэй уулзлаа. Тус зөвлөл нь Боловсролын сайдын тушаалаар томилогддог ба Ажлын албаны дэргэд сонгон шалгаруулах үйл ажиллагаанд хөндлөнгийн хяналт тавих, сонгон шалгаруулах үйл ажиллагаатай холбогдон гарсан өргөдөл, гомдолд хариу өгөх чиг үүрэгтэй байна. Уулзалтаар Орон тооны бус зөвлөлийн ажиллах дүрэм, хурлын дэгийг шинэчлэн батлах, 2025-2026 оны хичээлийн жилд боловсролын зээлийн сангийн санхүүжилтээр гадаадад зээл, тэтгэлгээр суралцагч нарыг сонгон шалгаруулах үйл ажиллагаанд ил тод байдлыг ханган хамтран ажиллах талаар санал солилцлоо.

Улсын Их Хурлын Боловсрол, соёл, шинжлэх ухаан, спортын байнгын хорооны 2024 оны 02 дугаар тогтоолоор байгуулагдсан Боловсролын зээлийн сангийн үйл ажиллагаа, журмын биелэлтэд хяналт шалгалт хийх, холбогдох санал дүгнэлт гаргах, шийдвэрийн төсөл боловсруулах үүрэг бүхий ажлын хэсгээс их, дээд сургуулийн оюутнуудын дунд энэ талаар хэлэлцүүлэг зохион байгуулж байна. Ажлын хэсгийн ахлагч О.Батнайрамдал өнөөдөр (2025.03.24) МУИС, ШУТИС, МУБИС-ийн оюутан залуустай уулзалт хийж, тус сангийн журмын шинэчлэлийн талаар санал солилцлоо. Байнгын хорооны ажлын хэсэг Боловсролын зээлийн сангийн журмыг шинэчлэн батлах нь зүйтэй гэж үзэж буй бөгөөд Засгийн газарт чиглэл өгөх тухай тогтоолын төслийг энэ долоо хоногт Боловсрол, соёл, шинжлэх ухаан, спортын байнгын хорооны хуралдаанаар хэлэлцүүлэн батлуулахаар ажиллаж байна. Дээрх сангийн журмыг шинэчлэх асуудлаар их, дээд сургуулийн оюутнууд, багш, мэргэжилтнүүдийн саналыг авах зорилготой уг хэлэлцүүлэгт Боловсролын зээлийн сангийн Сургалтын зээл, тэтгэлгийн хэлтсийн дарга Б.Гантөмөр, Сургалтын буцалтгүй тусламжийн хэлтсийн ахлах мэргэжилтэн Ч.Гэрэлчимэг нар мэдээлэл өгөв. Дэлгэрэнгүй мэдээллийг: https://www.parliament.mn/nn/74332/

Чехийн талтай Боловсролын хэлэлцээрээ шинэчилж, Монголоос очих оюутан, багш нарын нөхцлийг сайжруулах, “Ерөнхийлөгчийн илгээлт 2100” хөтөлбөрөөр илгээх оюутны тоог нэмэгдүүлэх талаар ахиц гаргалаа. Ерөнхийлөгчийн илгээлтээр 29 оюутан сурч байна. 8 нь жил хагасын өмнө ирээд өнөөдөр байгалийн ухааны чиглэлээр 1-р курсэд, үлдсэн 21 нь Карлийн их сургуульд хэлний бэлтгэлдээ сурч байна. Эдгээр оюутнууд ирэх намраас их, дээд сургуулиудад цөмийн инженер, компьютерын шинжлэх ухаан, хүнсний чанар-аюулгүй байдал, статистик зэрэг сонгосон мэргэжлээрээ суралцах юм.