Category: Мэдээ

Боловсролын зээлийн сангийн Ажлын албаны дарга иргэдтэй биечлэн уулзаж, зээл, тэтгэлэг, эргэн төлөлттэй холбоотой тулгамдсан асуудал, санал хүсэлтийг сонсон, харилцан санал солилцлоо. Уулзалтад оролцсон иргэд өөрт хэрэгтэй мэдээллээ шууд эх сурвалжаас авч, сонирхсон асуултаа газар дээр нь тодруулсан нь ач холбогдолтой болсныг онцолсон байна. Түүнчлэн байгууллагын удирдлагатай нүүр тулан уулзаж, санал бодлоо нээлттэй илэрхийлэх боломж бүрдсэнд талархалтай байгаагаа илэрхийллээ. Ажлын албаны дарга иргэдээс гарч буй санал, шүүмжлэл бүр байгууллагын үйл ажиллагааг илүү боловсронгуй болгох, үйлчилгээний хүртээмж, чанарыг сайжруулахад үнэтэй хувь нэмэр оруулдаг гэдгийг тэмдэглэв. Мөн цаашид иргэдтэй хийх нээлттэй уулзалтыг тогтмол зохион байгуулж, санал хүсэлтийг үйл ажиллагаандаа тусган ажиллах чиглэл баримталж байгааг мэдэгдлээ.

Боловсролын салбарт хэрэгжүүлэх “Чөлөөлье” санаачлага, бодлогын шинэчлэл, зорилт, арга хэмжээ болон хүрэх үр дүнг иргэд, олон нийтэд сурталчлан таниулах, санал хүсэлтийг нь сонсож, шуурхай шийдвэрлэх зорилгоор “НЭЭЛТТЭЙ ХААЛГАНЫ ӨДӨРЛӨГ”-ийг 2026 оны 05 дугаар сарын 11, 12, 13-ны өдрүүдэд Жанжин Д.Сүхбаатарын талбайд зохион байгуулж байна. Тус өдөрлөгт Боловсролын зээлийн сан оролцож, зээл, тэтгэлэг, буцалтгүй тусламж болон үйл ажиллагааны талаарх мэдээлэл, зөвлөгөөг иргэдэд хүргэн ажиллаж байна.

Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөн-ий хүрээнд 2026 оны 5 дугаар сарын 9-ний өдөр Чингэлтэй дүүргийн Хойморь хайрхан-д зохион байгуулагдсан мод тарих арга хэмжээнд Боловсролын зээлийн сан идэвхтэй оролцлоо. Тус арга хэмжээнд боловсролын салбарын нийт 8 байгууллагын 141 албан хаагч оролцож, байгаль орчныг хамгаалах, ногоон хөгжлийг дэмжих, мод тарих соёлыг түгээн дэлгэрүүлэх үйлсэд хувь нэмрээ оруулан нийт 1145 мод тарьсан байна. Боловсролын зээлийн сан нь зөвхөн боловсролын хүртээмж, боломжийг нэмэгдүүлэхэд чиглэсэн үйл ажиллагаа хэрэгжүүлэхээс гадна байгаль орчинд ээлтэй, нийгмийн хариуцлагатай оролцоог дэмжин ажилладаг билээ. Энэ удаагийн мод тарих арга хэмжээнд оролцсоноороо ногоон ирээдүйг бүтээх, эрүүл аюулгүй орчныг бүрдүүлэх үйлсэд бодит хувь нэмэр орууллаа. Цаашид ч Боловсролын зээлийн сан нь байгаль орчны хамгаалал, тогтвортой хөгжил, нийгмийн сайн сайхны төлөөх санаачилга, хамтын үйл ажиллагаанд идэвхтэй оролцож ажиллах болно.

Өнөөдөр Eagle News телевизийн эфирээр Боловсролын зээлийн сангийн үйл ажиллагаа, зээлийн хэрэгжилт, эргэн төлөлт, мэдээллийн системийн шинэчлэл болон цаг үеийн асуудлаарх байр суурийн талаар дэлгэрэнгүй мэдээлэл өглөө.Энэ хүрээнд гадаадад зээлээр суралцсан иргэдийн зээлийн гэрээний хэрэгжилт, авлагын асуудлыг нягтлан шалгах, мэдээллийн санг нэгтгэх, зээлийн эргэн төлөлтийг нэмэгдүүлэх, үйл ажиллагааны ил тод байдал, цахим шилжилтийг эрчимжүүлэх чиглэлээр үе шаттай ажлуудыг хэрэгжүүлж байна.Тухайлбал, гадаадад зээлээр суралцсан нийт 1255 зээлдэгчтэй холбоотой 70.6 сая ам.долларын авлагын асуудлыг судалж, гэрээний хэрэгжилтийг дүгнэх ажлыг эхлүүлээд байна. 1255 зээлдэгчийн гэрээг дүгнэх шаардлагатай байгаа нь ажлын хэсэг тогтоосон.Зээлийн эргэн төлөлтийн үзүүлэлт жил дараалан өсөж байна. Тодруулбал, 2023 онд 11.6 тэрбум төгрөг, 2024 онд 14.5 тэрбум төгрөг, 2025 онд 17.9 тэрбум төгрөгийн эргэн төлөлт төвлөрсөн бол 2026 оны 5 дугаар сарын 6-ны өдрийн байдлаар 5.1 тэрбум төгрөгийн эргэн төлөлт хийгээд байна.2025 онд Боловсролын зээлийн сангаас 17,802 суралцагчид нийт 108.2 тэрбум төгрөгийн тэтгэлэг, буцалтгүй тусламж, зээл олгосон нь боловсролын хүртээмжийг нэмэгдүүлэх, хүний хөгжлийг дэмжих бодлогын үргэлжлэл болж байна.Мөн мэдээллийн системийн шинэчлэлийн хүрээнд E-Geree системийг нэвтрүүлж, дотоодын 28 мянга гаруй, гадаадын 2 мянга гаруй суралцагчийн гэрээг цахимжуулах ажлыг үе шаттай хэрэгжүүлж байна.Түүнчлэн “Ерөнхийлөгчийн илгээлт-2100” тэтгэлэгт хөтөлбөр амжилттай хэрэгжиж байна. Уг хөтөлбөр нь Монгол Улсын 330 сум, нийслэлийн хороо бүрээс нэг шилдэг төгсөгчийг сонгон шалгаруулж, дэлхийн нэр хүндтэй их, дээд сургуульд суралцах боломж олгох зорилготойгоор хэрэгжиж эхэлсэн.Түүнчлэн элсэлтийн шалгалттай холбогдуулан Боловсролын зээлийн сангаас он гарснаас хойш 10 гаруй аймаг, нийслэлийн дүүргүүдийн төгсөх ангийн сурагчид, тэдний эцэг эх, асран хамгаалагчдад зориулсан мэдээлэл, зөвлөгөө өгөх ажлыг зохион байгуулж, 10,000 гаруй иргэнд гадаад, дотоодын зээл, тэтгэлэг, буцалтгүй тусламжийн талаарх мэдээллийг хүргэн ажилласан байна.Боловсролын зээлийн сан цаашид зээлийн гэрээний хэрэгжилтийг сайжруулах, эргэн төлөлтийг нэмэгдүүлэх, мэдээллийн сангийн уялдаа холбоог бэхжүүлэх, үйл ажиллагааны нээлттэй, хариуцлагатай байдлыг хангах, боловсролын санхүүжилтийн хүртээмжийг нэмэгдүүлэх чиглэлээр бодлогын шинэчлэлийг үргэлжлүүлэн хэрэгжүүлнэ.

Өвөрхангай аймагт “Боловсролыг дэмжих жил”, аймгийн “Багшийн хөгжил” хөтөлбөрийн хүрээнд боловсролын салбарын байгууллагуудын хамтын ажиллагааг өргөжүүлэх, ахлах ангийн суралцагчид, эцэг эх, асран хамгаалагч, иргэд олон нийтэд их, дээд сургуулиудын хөтөлбөр, элсэлтийн журам, тэтгэлэг, боловсролын зээл, мэргэжил сонголтын талаарх мэдээллийг нэг дороос хүргэх зорилготой “Өвөрхангай боловсрол-ЭКСПО 2026” арга хэмжээ амжилттай зохион байгуулагдлаа. Тус арга хэмжээнд дотоодын томоохон их, дээд сургуулиудаас гадна ОХУ, БНХАУ, БНСУ, Япон, Герман, Филиппин зэрэг улсын их, дээд сургуулиудын төлөөлөл, боловсролын зуучлагч болон сургалтын төвүүд зэрэг нийт 31 байгууллага оролцсон бөгөөд Боловсролын зээлийн сан хамтран оролцож, сурагчид, эцэг эх, асран хамгаалагчдад шаардлагатай мэдээ, мэдээллийг хүргэн ажиллалаа. Энэ үеэр Боловсролын зээлийн сангаас сургалтын төлбөрийн зээл, хөнгөлөлтөд хамрагдах нөхцөл, шалгуур, Ерөнхийлөгчийн тэтгэлэг, бусад тэтгэлэгт хөтөлбөрүүд, мөн дотоод, гадаадын боловсролын санхүүжилтийн боломжийн талаар дэлгэрэнгүй мэдээлэл өгч, зөвлөгөө хүргэлээ. Ийнхүү арга хэмжээ нь сурагчдад боловсролын зорилгоо тодорхойлох, мэргэжлээ зөв сонгох, цаашдын суралцах боломжоо бодитоор төлөвлөхөд чухал дэмжлэг болсон юм.

Боловсролын зээлийн сангаас ерөнхий боловсролын 105 дугаар сургууль дээр 9-12 дугаар ангийн сурагчдад зориулан Боловсролын зээлийн сангаас үзүүлдэг үйлчилгээ, зээл, тэтгэлэг, буцалтгүй тусламжийн талаар мэдээлэл өгөх үйл ажиллагааг зохион байгууллаа. Тус арга хэмжээний үеэр сурагчдад дотоод болон гадаадын сургалтын тэтгэлэг, боловсролын зээлд хамрагдах боломж, тавигдах шаардлага, сонгон шалгаруулалтын журам болон цахим системийн ашиглалтын талаар дэлгэрэнгүй танилцуулж, сонирхсон асуултад хариулт өгч мэдээлэл солилцов. Арга хэмжээнд Боловсролын зээлийн сангийн Цахим хөгжүүлэлтийн хэлтсийн дарга Б. Баянмөнх, Дотоод зээл, тэтгэлэг, буцалтгүй тусламж хариуцсан мэргэжилтэн Л. Базардаргиа, Цахим хөгжүүүлэлт хариуцсан мэргэжилтэн П. Учрал нар оролцож, сурагчдад мэдээлэл хүргэн ажиллалаа. Боловсролын зээлийн сан нь иргэдэд боловсролын санхүүгийн дэмжлэгийн талаар бодит, хүртээмжтэй мэдээлэл хүргэх, сурагч, оюутнуудыг боломжит хөтөлбөрүүдэд хамруулах чиглэлээр цаашид мэдээлэл, сурталчилгааны ажлыг үе шаттайгаар зохион байгуулах юм.

Дундговь аймгийн хэмжээнд “Хөдөөгийн сэргэлт – Шинэ Дундговь” аймгийн Засаг даргын 2024–2028 оны үйл ажиллагааны хөтөлбөрт тусгагдсан “Оюунлаг Дундговь” дэд хөтөлбөр, мөн “Боловсрол, эрүүл мэндийг дэмжих жил”-ийн хүрээнд ахлах ангийн сурагчдад мэргэжлээ зөв сонгох, ирээдүйн зорилгоо тодорхойлоход дэмжлэг үзүүлэх зорилготой “Боловсрол экспо-2026” өдөрлөгийг зохион байгууллаа. Энэ үеэр Боловсролын зээлийн сан өдөрлөгт оролцож, сурагчдад дотоод, гадаадын сургалтын зээл, тэтгэлэг, буцалтгүй тусламжийн боломж, тэдгээрт хамрагдах нөхцөл, шаардлага, мэдээллийг танилцуулан зөвлөгөө өгч ажиллалаа. Энэ нь сурагчид ирээдүйн боловсролын зорилгоо тодорхойлох, санхүүгийн боломжийн талаар бодит ойлголт авахад чухал ач холбогдолтой байв. Тус өдөрлөгт аймгийн төвийн ерөнхий боловсролын сургуулиудын 9–12 дугаар ангийн сурагчид, эцэг эх, асран хамгаалагчид оролцож, нийт 1500 гаруй сурагч боловсролын чиг баримжаа, мэргэжил сонголт, элсэлт, тэтгэлэг, сургалтын боломжийн талаар нэг дороос цогц мэдээлэл авах нөхцөл бүрдлээ. Мөн өдөрлөгт гадаад, дотоодын 21 их, дээд сургууль, коллеж, сургалт зуучлалын 14 төв оролцож, элсэлтийн журам, шинэ хөтөлбөр, мэргэжлийн чиглэл, тэтгэлэгт хөтөлбөрийн талаарх мэдээлэл, зөвлөгөөг хүргэсэн нь сурагчдад элсэлтийн шалгалтаа амжилттай өгч, хүссэн сургуульдаа элсэн суралцахад бодит дэмжлэг болж байна.